Kosningabarátta Evu Joly í molum - talsmaður hennar segir af sér

Yannick Jadot, ESB-þingmaður og talsmaður Evu Joly vegna forsetaskosninganna í Frakklandi vorið 2012, tilkynnti á Twitter miðvikudaginn 23. nóvember að hann væri hættur störfum fyrir Evu Joly. Hann segist ósammála nýrri stefnu sem Joly hefði tekið en hún er frambjóðandi Evrópskra umhverfissinna – græningja (EELV).

Forsíða Le Figaro miðvikudaginn 23. nóvember - Eva Joly ræðst á Hollande og sósíalista.

Það hefur vakið athygli í Frakklandi að Eva Joly dró sig í hlé frá kosningabaráttunni í nokkra daga. Var jafnvel talið að hún ætlaði að draga sig í hlé vegna ágreinings meðal stuðningsmanna hennar. Hún gekk hins vegar að nýju fram á völlinn þriðjudaginn 22. nóvember í viðtali við Le Monde og sjónvarpsstöðina France 3. Að morgni miðvikudags 23. nóvember sat hún fyrir svörum í sjónvarpsstöðinni RTL.

Jadot er ósammála gagnrýni sem Eva Joly hefur látið falla í garð sósíalista og telur að hún standi ekki heilshugar að samstarfi flokks sósíalista annars vegar og umhverfisverndarsinna hins vegar. Jadot er landskunnur í Frakklandi fyrir baráttu sína undir merkjum Greenpeace.

Í Le Monde segir að Jadot hafi kynnt flokksfélögum sínum ákvörðun sína mánudaginn 21. nóvember. „Hann sagðist ekki vera sáttur við ræðu Evu þar sem hún gerði kröfur á hendur sósíalistum,“ segir Sergio Coronado sem er einn af stjórnendum kosningarbaráttunnar.

„Tónninn í ræðum Evu hefur harnað. Hann gerði sér grein fyrir því að það væri ekki besta leið hans til að öðlast ráðherraembætti að vera talsmaður hennar,“ segir Coronado. Eva Joly sagði í viðtali við Le Monde og sjónvarpsstöðina France 3 þriðjudaginn 22. nóvember að hún gerði sér enga stóra drauma um samkomulag á milli sósíalista og EELV.

Deilur Joly og Jadot sem bæði sitja á ESB-þinginu má rekja til ágreinings í viðræðum við sósíalista um kjarnorkuver í Flamanville. Yannick Jadot lagði til að kallað yrði eftir skýrslu sérfræðinga um kjarnorkuverið og á þann veg yrði komið á sátt í málinu á milli sósíalista og græningja. Eva Joly hafnaði afdráttarlaust þeirri hugmynd.

Le Monde segir að Eva Joly hafi lagt sig fram um að draga skil á milli sín og François Hollande, forsetaframbjóðanda sósíalista. Hún hafi tekið nýtt skref á þeirri braut að morgni miðvikudagsins 23. nóvember með því að neita að svara spurningum í sjónvarpsstöðinni RTL um það hvort hún mundi hvetja fólk til að kjósa François Hollande í síðari umferð forsetakosninganna. „Ég veit hver óvinurinn er. Markmið mitt er að vinna sigur á Nicolas Sarkozy,“ svaraði hún aðeins þegar hún var þráspurð um hvort hún mundi styðja Hollande.

Í Le Figaro er því slegið upp á forsíðu að Eva Joly ráðist á François Hollande.