Wolfgang Schäuble: Þjóðverjar vilja ekki Þýska-Evrópu

Wolfgang Schäuble, fjármálaráðherra Þýskalands, birtir grein í sex Evrópublöðum laugardaginn 20. júlí þar sem hann segir fráleitt að fyrir ráðamönnum í Berlín vaki að skapa Þýska-Evrópu. Hann segir Þjóðverja hafa sætt ósanngjarnri gagnrýni bæði fyrir að halda um of að sér höndum og láta of mikið að sér kveða.

Wolfgang Schäuble

Schäuble er áhrifamesti ráðherra í þýsku ríkisstjórninni að baki Angelu Merkel kanslara. Að því er varðar evru-málefni hefur hann gegnt lykilhlutverki innan evru-ráðherrahópsins síðan tekið var til við að aðstoða Grikki fyrir rúmum þremur árum.

Í grein sinni segir Schäuble meðal annars:

„Það er misskilningur að Þjóðverjar vilji gegna sérstöku hlutverki í Evrópu. Við viljum ekki Þýska-Evrópu. Við biðjum ekki aðra að verða eins og við. Að baki ásökuninni í þessa veru býr ekki meira en staðalímyndinni sem er undirrót hennar. Eru Þjóðverjar gleðisnauðir kapítalistar þjakaðir af vinnusiðferði mótmælenda? Staðreynd er að í mörgum vel stæðum héruðum Þýskalands hafa katólikkar búið um aldir. Eru Ítalir ekki gefnir fyrir annað en dolce far niente (unaðslegt aðgerðaleysi)? Ekki þarf annað en kynna sér iðnaðarhéruðin á Norður-Ítalíu til að blása á þessa fullyrðingu. Stjórnast allur norðurhluti Evrópu af markaðnum? Norrænu velferðarþjóðfélögin þar sem lögð er áhersla á félagslega samstöðu og jafna tekjudreifingu falla vissulega ekki að þessari skrípamynd.

Þeir sem ala á slíkum staðalímyndum ættu að kynna sér nýlegar kannanir sem sýna að skýr meirihluti fólks – ekki aðeins í norðurhluta heldur einnig suðurhluta Evrópu – vill berjast við kreppuna með umbótum, minnkun ríkisútgjalda og lækkun skulda.

Þjóðverjar vilja síst allra þjóða að til verði Þýsk-Evrópa. Við viljum að Þýskaland gegni þjónustuhlutverki við endurreisn efnahags Evrópu – án þess að Þýskaland veikist. Það þjónaði ekki hagsmunum neins. Við viljum sterka og samkeppnishæfa Evrópu þar sem við stjórnum ríkisfjármálum af skynsemi og þar sem við söfnum ekki meiri og meiri skuldum.“