Ítalskur ESB-þingmaður: Mafían teygir anga sína um allar stofnanir ESB - býr sig undir meiri aðgerðir

Mafían hefur tengiliði í öllum stofnunum ESB segir formaður sérnefndar ESB-þingsins um glæpastarfsemi. Sonia Alfano, ESB-þingmaður frá Ítalíu, fer með formennsku í nefndinni sem fjallar um skipulagða glæpastarfsemi, spillingu og peningaþvætti. Í skýrslu nefndarinnar segir að mafían starfi ekki aðeins í suðurhluta Ítalíu heldur víða um Evrópu.

Sonia Alfano

„Því miður á mafían þegar fulltrúa í stjórnklefanum þegar litið er til Evrópu. Hún á tengiliði innan allra ESB-stofnana,“ sagði Sonia Alfano við Euronews. Skýrslan með tillögum nefndarinnar var samþykkt miðvikudaginn 23. október.

Mikill meirihluti ESB-þingmanna studdi tillöguna þar sem varað er við hættunni af því að glæpahópar (mafían) lagi flókið, stórt net sitt og mikla fjárhagslega getu að ólíkum landfræðilegum og félagslegum aðstæðum innan ESB.

Þingmennirnir telja að mafían beiti „valdi“ á takmarkaðan hátt, hún kjósi „heldur að “búa um sig„ í því skyni að hagnast mikið án þess að vera sýnileg“.

„Þegar ég tala um mafíuna á ég ekki við valdbeitingararminn, þá sem fremja launmorð, stela eða handrukkara. Ég á við þjónustumafíuna sem starfar innan stofnananna, í opinberri stjórnsýslu, í öllum stofnunum sem sýsla með ESB-málefni, menn sem vita á hvaða hnappa ber að þrýsta,“ sagði Sonia Alfano en hún starfar náið með ítalska blaðamanninum Roberto Saviano sem hefur rannsakað mafíuna um langan aldur.

„Um þessar mundir láta skipulagðir glæpahópar verulega að sér kveða í Evrópu. Til dæmis hefur mafían komið sér vel fyrir í þýska, breska og spænska hagkerfinu án þess að ríkisstjórnir þessara landa láti íbúa þeirra vita. Mafían er á verði og hugar að framtíð álfu okkar,“ sagði Roberto Saviano við Euronews.

Í skýrslu þingnefndarinnar segir að skipulögð glæpastarfsemi kosti fyrirtæki í ESB 670 milljarða evra ár hvert.

ESB-þingið leggur til að varið verði fjármunum á vegum ESB til verkefna og aðgerða til að hefta útbreiðslu mafíunnar innan ESB. Næsta skref í málinu er að ráðherraráð ESB og framkvæmdastjórn ESB fallist á tillöguna og að henni verði hrundið í framkvæmd. Megintilgangurinn með tillögu þingsins er að auðvelda þinginu sem kosið verður í maí 2014 að þrýsta á framkvæmdastjórnina að leggja fram lagafrumvarp og að aðildarríkin vinni að framkvæmd þess.

Heimild: Europaportalen