Fulltrúar Capacent heimsækja úrtakshóp og spyrja um ESB-mál - gefa konfektpoka fyrir svörin

Capacent gengst nú fyrir nákvæmri könnun á afstöðu fólks til Evrópusambandsins. Leitað er til þess hóps fólks sem reglulega tekur þátt í könnunum hjá fyrirtækinu. Að jafnaði er netið notað til að leita viðhorfa hópsins. Að þessu sinni er meira lagt í könnunina því að fulltrúi Capacent er sendur heim til viðkomandi, ræðir við hann og skráir upplýsingar á fartölvu. Þegar samtalinu lýkur er svarandanum afhentur lítill konfektpoki frá Nóa Síríus sem þakklætisvottur frá Capacent.

Einn úr úrtakshópi Capacent skýrði Evrópuvaktinni frá heimsókninni til sín. Hann hefði spurt spyrjandann hver stæði að könnuninni en fékk þau svör hjá honum að hann vissi það ekki.

Þeim sem sat fyrir svörum þótti spurningarnar að nokkru leiðandi, jafnvel mætti telja að fyrir þeim sem samdi spurningarnar hefði vakað að læða hugmyndum að hjá þeim svaraði: Efasemdum um hvort hann vissi nógu mikið um ESB til að geta tekið afstöðu. Efasemdum um hvort ríkisstjórn Íslands væri rétti aðilinn til að leiða þjóðina út úr kreppu. Óskað er eftir afstöðu til fjölmiðla almennt en ekki til einstakra fjölmiðla. Blöðin, netið, sjónvarp tekið fyrir hvert fyrir sig en undir einum hatti.

Þá er spurt um áhersluatriði í starfsemi ESB, hvort sambandið ætti að leggja áherslu á efnahagsmál, hryðjuverk, skuldamál aðildarríkja o. s. frv. Skilja má spurninguna á þann veg að í svarinu felist leið til að hafa áhrif á stjórnendur ESB í Brussel.

Á fréttasíðu Capacent eru ekki birtar neinar upplýsingar um að þessi viðamikla og sérstaka könnun fari fram. Þar er hins vegar frétt frá miðvikudeginum 6. nóvember um að forsvarmenn sprotafyrirtækja líti fremur dökkum augum á efnahagsumhverfið og þróun efnahagsmála hér á landi, samkvæmt könnun sem framkvæmd var af Capacent í september.

Töluverður hópur forsvarsmanna sprotafyrirtækja telji jafnframt líklegt að fyrirtækið muni flytja úr landi á næstu árum. Ljóst sé að mörg fyrirtæki þurfi á auknu rekstrarfé að halda en forsvarsmenn telji aðgengi að því almennt fremur slæmt á Íslandi fyrir sprotafyrirtæki. Þrátt fyrir það séu flestir fremur bjartsýnir á framtíð síns fyrirtækis.

Könnunin var gerð meðal forsvarsmanna 373 frumkvöðla- og sprotafyrirtækja. Svarhlutfallið reyndist 42,4%. Í könnuninni var m.a. spurt. um rekstrarumhverfi, aðgengi að fjármagni og stuðningsumhverfi nýsköpunar.