Juncker vill í forsæti ESB - lýst sem drykkfelldum stórreykingamanni- nafni Christine Lagarde hreyft

Jean-Claude Juncker, fráfarandi forsætisráðherra Lúxemborgar og formaður ráðherrahóps evrunnar í 10 ár, hefur lýst áhuga á að verða næsti forseti framkvæmdastjórnar ESB. Hann áréttaði þetta í samtali við þýsku RBB-útvarpsstöðina fimmtudaginn 9. janúar. Leiðin kann að verða torsótt.

Jean-Claude Juncker

Juncker sækist eftir að verða oddviti á framboðslista EPP-flokksins, mið-hægriflokksins, stærsta þingflokksins á ESB-þinginu. Martin Schulz, forseti ESB-þingsins, er oddviti á lista sósíalista og jafnaðarmanna. Kosið verður til ESB-þingsins í maí.

EPP tekur ákvörðun um oddvita af sinni hálfu á fundi í mars í Dublin. Der Spiegel segir að Angela Merkel Þýskakanslari sé treg í taumi og hafi ekki áhuga á Juncker. Henni hafi þótt nóg um gagnrýni hans á Þjóðverja þegar hann stýrði evru-hópnum. Talsmaður Merkel hefur hafnað skoðun Spiegel á málinu.

Juncker hefur sjálfur talað um um „vinsamlegt“ samband sitt við Merkel, hann hafi hringt í hana tvisvar á síðustu þremur vikum.

Xavier Bettel, núverandi forsætisráðherra Lúxemborgar, hefur einnig rætt við Merkel í síma. „Hún fullvissaði mig um að hún hefði ekki áform um að láta Evrópu fara á mis við hæfileika fyrrverandi formanns evru-hópsins,“ sagði Bettel við dagblaðið L‘essentiel miðvikudaginn 8. janúar.

Á vefsíðunni EUobserver segir föstudaginn 10. janúar að Jeroen Dijsselbloem, fjármálaráðherra Hollands sem tók við formennsku í evru-hópnum af Juncker, leggi forvera sínum ekki lið í baráttu hans. Hann sagði í spjallþætti í hollensku sjónvarpi að kvöldi mánudags 6. janúar að Juncker væri „drykkfelldur stórreykingamaður“. Eftir að hann lét af formennsku hefðu ráðherrafundirnir orðið „miklu meira í anda Kalvíns“.

Juncker brást við ummælum eftirmanns síns í blaðinu Luxembourg Wort miðvikudaginn 8. janúar og sagði: „Ég glími ekki við drykkjuvandamál … og ég vil ekki bregðast við ummælum sem falla í gamansömum umræðuþætti í hollensku sjónvarpi.“

Frakkinn Michel Barnier sem fer með málefni innri markaðarins í framkvæmdastjórn ESB gerir sér enn vonir um að verða oddviti EPP í ESB-þingkosningunum segir franska blaðið Le Monde. Sagt er að útgáfu bókar sem hann hafi skrifað hafi verið frestað til að kynna mætti höfundinn sem „frambjóðanda“ í forsæti framkvæmdastjórnarinnar ef svo bæri undir.

Franska ríkisstjórnin stendur ekki að baki Barnier enda er hann ekki úr flokki franskra sósíalista.

Í þýska blaðinu Rheinische Post hefur nafni Christine Lagarde, fyrrverandi fjármálaráðherra Frakklands og núverandi forstjóra Alþjóðagjaldeyrissjóðsins, verið hreyft sem hugsanlegum oddvita EPP.

Í Lissabon-sáttmálanum segir að sá þingflokkur sem fær flesta menn kjörna á ESB-þingið skuli eiga fyrsta rétt til formennsku í framkvæmdastjórn ESB. Angela Merkel hefur hins vegar hafnað öllum tillögum um að eitthvað gerist sjálfkrafa á þessum vettvangi. Í EUobserver segir að afstaða hennar leiði til þess að efnt verði til viðræðna á bakvið tjöldin um skiptingu valdamestu embættanna og þar komi til umræðu hverjir eigi að skipa embætti forseta leiðtogaráðs ESB, utanríkis- og öryggismálastjóra ESB, framkvæmdastjóra NATO og forseta ESB-þingsins.

Ekki sé aðeins tekið mið af pólitískri stöðu heldur einnig landafræði, það er að ríki í austri og vestri, norðri og suðri, eigi fulltrúa í hópnum og þar sé að minnsta kosti ein kona.

Heimild: EUobserver