Össur neitar að ræða ESB á alþingi

Athygli vekur, að engar umræður eru á alþingi um ESB-málefni. Örsjaldan svarar Össur Skarphéðinsson, utanríkisráðherra, fyrirspurnum um málið. Að hann gefi alþingi skýrslu um stöðu þess er óþekkt. Þá er málið ekki rætt utan dagskrár.

Össur Skarphéðinsson neitar að ræða ESB-mál á alþingi.

Að sögn þingmanna, sem hafa viljað ræða málið við Össur í þingsalnum, skorast Össur undan öllum slíkum tilmælum með því að vísa til þess, að málið sé á ábyrgð alþingis. Þingið hafi samþykkt að ganga til viðræðna við ESB, meiri hluti utanríkismálanefndar þingsins hafi reifað efnisleg skilyrði aðildar. Hann [Össur] sé ekki annað en verkfæri í höndum alþingis og þess vegna þjóni engum tilgangi að rökræða eitthvað við sig í þingsalnum!

Með þessu er Össur í reynd að varpa pólitískri ábyrgð á ESB-umsókninni frá sér og á herðar Árna Þórs Sigurðssonar, hins vinstri-græna formanns utanríkismálanefndar alþingis. Árni Þór er aðildarsinni eins og Össur og miðað við stöðuna innan stjórnarflokkanna er það þægindasamkomulag á milli þeirra ESB-skoðanabræðranna, Össurar og Árna Þórs, best sé að þegja sem mest um ESB. Það sé besta leiðin til troða Íslendingum í poka þess, enda hafi það alltaf vakað fyrir Samfylkingunni að fara í pokann í Brussel en ekki kynna sér, hvað sé í honum.