Verðbólgan hækkar enn-hvað ætlar ríkis­stjórnin að gera?

Nýjar tölur um verðbólgu benda til að þróunin sé mjög varasöm og stefni í átt til aukinnar verðbólgu. Nýjustu tölur Hagstofunnar nú í lok apríl eru að vísitala neyzluvöruverðs hafi hækkað um 0,78%. Verðbólguhraðinn síðustu 3 mánuði er kominn í 12,3% og verðbólgan síðustu 12 mánuði nemur 2,8% og er þar með orðin hærri en verðbólgumarkmið Seðlabankans. Því fer fjarri, að ríkisstjórn og Seðlabanki séu að ná tökum á verðbólgunni, heldur þvert á móti. Þetta er að vísu það sama og er að gerast í flestum nálægum löndum en allir sjá hættuna, sem er fólgin í þessari þróun hér. Hinn almenni launamaður má ekki við neinum hækkunum hvorki á verði vöru eða þjónustu eða opinberum gjöldum. Að ekki sé talað um verðtryggingu lánaskuldbindinga. Og það má atvinnureksturinn ekki heldur.

kaninn.is

Hvað ætlar ríkisstjórnina að gera til þess að sporna við þessari þróun? Hvaða boðskap hefur hún til launþega um það mál í dag, 1. maí, á hátíðisdegi verkalýðsins? Það eru því miður engar vísbendingar um, að ríkisstjórnin hafi nokkrar hugmyndir um hvernig hún eigi að bregðast við.

Auðvitað er þessi þróun ekki öll hennar sök. Hækkun á verði eldsneytis kemur illa við í öllum löndum. Benzínverð fer enn hækkandi. Og fyrr eða síður kemur þessi hækkun á eldsneyti fram í hærra vöruverði. Það kostar meira að flytja vörur á milli staða, ekki bara á landsbyggðinni. Rekstrarkostnaður bíla, sem flytja vörur innan höfuðborgarsvæðisins hefur hækkað verulega og það hlýtur að koma fram með einum eða öðrum hætti í vöruverði.

Við Íslendingar höfum langa og vonda reynzlu af verðbólgu. Við vitum að þegar hún er komin af stað er erfitt að stöðva þá þróun.

Þessa nýju verðbólguþróun verður að kæfa í fæðingu. Þess sjást engin merki að aðilar vinnumarkaðar séu með hugann við það viðfangsefni.