Sigurður Kári hjólar í forseta ESA - vill að hann víki í Icesave-málinu

Sigurður Kári Kristjánsson, þingmaður Sjálfstæðisflokksins, vekur máls á mikilvægu atriði varðandi málatilbúnað Eftirlitsstofnunar EFTA (ESA) á hendur Íslendingum í grein sem hann ritar í Morgunblaðið 4. maí. Hann minnir á hvernig Per Sanderud, forseti ESA, hefur talað til Íslendinga og furðar sig á því að ekki sé vikið að því í rúmlega 30 blaðsíðna bréfi Árna Páls Árnasonar, efnahags- og viðskiptaráðherra, til ESA, sem skrifað er þegar tæpt ár er liðið frá því að ESA tók málstað Breta og Hollendinga gegn Íslendingum í Icesave-málinu.

Sigurður Kári Kristjánsson

Hér á Evrópuvaktinni hefur því sjónarmiði oft verið hreyft frá því að Sanderud var hér á landi í júní 2010 til að fagna 50 ára afmæli EFTA, að hann hafi gert sjálfan sig ef ekki ESA í heild vanhæfa til að fjalla frekar um Icesave-málið. Sanderud hafði mótað sér svo skýra og neikvæða afstöðu í garð Íslendinga að hann ætlaði að koma málstað þeirra fyrir EFTA-dómstólinn, hvað sem það kostaði, auk þess sem hann sagðist sannfærður um að dómstóllinn væri á sínu máli. Var ljóst að efni svarbréfs Íslendinga við áminningarbréfi ESA mundi engu breyta.

Í fyrrnefndri grein sinni segir Sigurður Kári meðal annars að ummæli Sanderuds séu svo gildishlaðin að draga verði í efna að hann „geti með óhlutdrægum hætti tekið afstöðu til þess deilumáls sem hann sjálfur hefur nú til meðferðar“. Þingmaðurinn segir enn fremur:

„Að mínu mati gerðist forseti eftirlitsstofnunarinnar með orðum sínum sekur um að kveða upp dóm í Icesave-málinu fyrirfram og án þess að hafa kynnt sér málstað annars málsaðilans, sem í þessu tilviki er íslenska ríkið.“

Í pottinum taka menn undir þessi orð og lýsa megnri undrun á því að ekki skuli tekið á þessu atriði í bréfi efnahags- og viðskiptaráðherra til ESA. Eitt er víst að þögnin um það verður ekki til að draga úr líkum á hlutdrægri afstöðu stofnunar sem virðist hafa gert upp við sig að hún hafi rétt fyrir sér hvað sem líður þeim svörum sem henni eru send.