Uppnám í samskiptum alþingis og ríkisendurskoðunar - um hvað?

Samkvæmt niðurstöðum skýrslu sem Kastljós hefur undir höndum, og er dagsett í nóvember 2009, nemur heildarkostnaður við stærstu kerfisinnleiðingu á Íslandi að minnsta kosti fjórum milljörðum króna. Í stuttu máli lítur málið svona út að sögn ruv.is:

„Fjármálaráðherra fékk heimild árið 2001 til að kaupa nýtt hugbúnaðarkerfi fyrir 160 milljónir króna. Átta árum síðar var kostnaður kominn í fjóra milljarða króna. Niðurstaða Ríkisendurskoðunar er afdráttarlaus: Öll meðferð þessa máls er gölluð og í andstöðu við gildandi fyrirmæli fjárreiðulaga.“

Frá því að þetta var birt hefur komið í ljós að þetta er ekki niðurstaða ríkisendurskoðunar sem telur að um lögreglumál sé að ræða vegna trúnaðarbrests, lekið hafi verið ófullgerðri skýrslu. Sveinn Arason ríkisendurskoðandi ætlar að kæra leka á skýrslunni til lögreglu.

Ríkisendurskoðun lýkur ekki skýrslum af þessu tagi án þess að fjármálaráðuneytið bregðist við henni.

Steingrímur J. Sigfússon var fjármálaráðherra þegar skýrslan er dagsett. Ríkisendurskoðandi segir á ruv.is að: „Gunnar H. Hall fjársýslustjóri sé eini maðurinn utan stofnunarinnar sem hafi fengið að sjá drögin að skýrslunni. Hann segir að þetta sé frávik frá vinnureglum en telur ekki óeðlilegt að Gunnari hafi verið sýnd drögin. Hann hafi talið rétt að fá viðbrögð fjársýslustjóra við skýrslunni eins og hún lægi fyrir.“

Spurningin er þessi: Sat Gunnar H. Hall einn að lestri skýrslunnar? Gerði hann ekki fjármálaráðherra grein fyrir þessari skýrslu?

Þetta er hið furðulegasta mál að ræða og Þór Saari talar um „gjörspillingu“. Óljóst er hvort Þór talar þar um kostnaðinn við töluvukerfið eða meðferð ríkisendurskoðunar á skýrslunni sem enn er þar til vinnslu.

Alþingismenn verða að taka á málinu á skipulegan hátt svo að unnt sé að átta sig á því hvert sé hneykslið í málinu. Hafi þeir ekki áttað sig á kostnaðartölum vegna tölvukerfisins í ríkisreikningi eða fjárlögum er ekki við aðra að sakast um þá yfirsjón. Hitt er verra sem fram hefur komið að þetta dýra tölvukerfi skili ekki þeim árangri sem að er stefnt. Hafa þingmenn engar áhyggjur af því? Hafa þeir kynnt sér hvernig kerfið virkar á skrifstofu alþingis?

Bj. Bj.