Grétar Þór slær fram kenningu um fjór­flokkinn - segir Björn Val einstæðan

Grétar Þór Eyþórsson, stjórnmálafræðingur við Háskólann á Akureyri, sagði „nýtt og óvenjulegt“ að þingmaður utan af landi flytti sig um set og byði sig fram í Reykjavík. Þetta skýrði að Björn Valur hefði goldið afhroð hjá VG í Reykjavík.

Fréttastofa ríkisútvarpsins leitaði til Grétars Þórs vegna vals á framboðslista laugardaginn 24. nóvember. Hann er að mati fréttastofunnar meðal fræðimanna á stjórnmálafræðisviðinu sem hafa ekki „talað sig dauða“ með skyndi-mati á pólitískum viðburðum.

Grétar Þór Eyþórsson

Margt bendir til að Grétar Þór þurfi að huga betur að staðreyndum áður en hann slær fram fullyrðingum sínum. Það var til dæmis fráleitt hjá honum að setja VG og Sjálfstæðisflokkinn í sömu skúffu í hádegisfréttum sunnudaginn 25. nóvember og tala um „fjórflokkinn“ sem hvergi býður fram. Á ruv.is er haft eftir fræðimanninum „að dræm þátttaka í langflestum prófkjörum síðustu vikurnar [sé][ til marks um minnkandi áhuga almennings á stjórnmálum og fjórflokknum“.

Hvers vegna greinir fréttastofan ekki nákvæmar frá úrslitum en með slíkum sleggjudómum? Í Reykjavík tóku um 7.500 manns þátt í prófkjöri sjálfstæðismanna en innan við 700 í forvali VG. Hið eina sem vakir fyrir þeim sem leggja þetta að jöfnu undir hatti „fjórflokksins“ eru andstæðingar Sjálfstæðisflokksins, þeir draga „fjórflokkinn“ aðeins úr hatti sínum til að forðast að geta yfirburða Sjálfstæðisflokksins gagnvart öðrum flokkum þegar kemur að vali á framboðslista.

Af því sem Grétar Þór sagði má draga þá ályktun að um einstætt tilvik sé að ræða hjá Birni Vali. Árið 1979 flutti Ólafur Jóhannesson sig af lista Framsóknarflokksins í Norðurlandi vestra til Reykjavíkur og sat sem slíkur til 1984. Árið 2003 flutti Halldór Ásgrímsson sig af lista Framsóknarflokksins á Austurlandi til Reykjavíkur og sat þar til 2006. Árið 2009 flutti Ólöf Nordal. Sjálfstæðisflokki, sig um set frá Austurlandi til Reykjavíkur og náði 4.sæti á lista flokksins í prófkjöri fyrir kosningar í apríl 2009.

Miðað við áfallið sem Björn Valur varð fyrir við útreiðina í forvali VG er svo sem skiljanlegt að menn í NA-kjördæmi reyni að róa hann með huggunarorðum – sé hins vegar rætt við stjórnmálafræðinga í fréttum ríkisútvarpsins ættu þeir að sjá sóma sinn í að alhæfa ekki á þann hátt sem Grétar Þór gerði.

Ástæða er til að velta fyrir sér hvort atgangur stjórnmálafræðinga dragi meira úr áhuga almennings á stjórnmálaþátttöku en stjórnmálamennirnir.

Bj. Bj.