Olían hækkar og hækkar...tími kominn á að rafbílavæða Ísland allt

Frá því snemma á áttunda áratugnum hafa verulegar verðhækkanir á olíu hvað eftir annað sett efnahag Íslendinga úr skorðum. Þetta gerðist fyrst snemma á þeim áratug í kjölfar þess að Arabaríkin hristu vestræn olíufyrirtæki af sér og stórhækkuðu verð á olíu. Sá leikur var endurtekinn tæpum áratug síðar.

Á seinni árum hefur mikil hækkun orðið á olíuverði á köflum vegna stríðsátaka í Miðausturlöndum. Þetta er að gerast nú um þessar mundir vegna átakanna í Írak. Olíuverð á tunnu sl.fimmtudag var komið í 116 dollara og hefur hækkað um 10% á hálfum mánuði.

Þetta sést á olíudælum hér og afleiðingin er veruleg hækkun á orkukostnaði þjóðarinnar, minnkandi ráðstöfunarfé heimila til annarra nota af þeim sökum og stórauknum eldsneytiskostnaði bæði fyrir útgerðarfyrirtæki og flugfélög.

Fyrir nokkrum áratugum voru mótaðgerðir bílaframleiðenda þær að leggja stóraukna áherzlu á sparneytni bíla. Þær hafa skilað töluverðu.

Nú er spurning hvort Íslendingar geti ekki gripið til róttækari aðgerða.

Miklar framfarir hafa orðið í framleiðslu rafbíla. Liggur ekki beint við að rafbílavæða Ísland allt þannig að innan ákveðinna tímamarka verði langflestir bílar rafknúnir?

Þetta er hægt að gera með því að stórlækka opinber gjöld á slíkum bílum. Að auki er ljóst að viðhaldskostnaður slíkra bíla er mun minni en þeirra bíla, sem við notumst nú að mestu leyti við.

Við getum ekki haldið áfram að taka á okkur þung fjárhagsleg áföll vegna stríðsátaka meðal annarra þjóða, þegar við blasir að við getum leyst vandann að hluta til með eigin aðgerðum.

SG