BBC saumar að Lawson lávarði vegna loftslagskoðana

Lawson lávarður

Það eru fleiri ríkisútvarpsstöðvar en hin íslenska RÚV sem sæta gagnrýni fyrir hlutdrægni. Í forystugrein í nýjasta hefti breska vikublaðsins The Spectator er sagt frá því að ekki muni líða á löngu þar til Nigel Lawson – fái sjónarmið hans á annað borð að heyrast í BBC – verði að fá leikara til að tala fyrir sig á stöðinni á sama hátt og Gerry Adams hafi gert þegar IRA hryðjuverkamennirnir létu mest að sér kveða á níunda áratugnum. Breska ríkisstjórnin bannaði að rödd Adams heyrðist á öldum ljósvakans en þá ákvað BBC að standa vörð um málfrelsið og leyfði leikara að tala fyrir hans hönd. Öðru máli gegnir um Lawson lávarð, fyrrverandi fjármálaráðherra Breta og fyrrverandi ritstjóra The Spectator. Hann fær ekki að koma fram í BBC í umræðum um loftslagsbreytingar nema honum fylgi yfirlýsing frá dagskrárstjórn BBC sem dregur úr gildi orða hans.

Hlustendur BBC geta kvartað til sérstakrar deildar innan útvarpsstöðvarinnar BBC’s Editorial Complaints Department sé þeim misboðið. Þessi deild úrskurðaði í vikunni að brotið hefði verið gegn reglum BBC í þættinum Today þegar Lawson lávarði var boðið að ræða við Sir Brian Hoskins, formann Grantham Institute for Climate Change, stofnunar um loftslagsmál. Kvörtunardeildin komst á þeirri niðurstöðu – undanlegri að mati The Spectator – að skoðanir Lawsons „styddust ekki við staðreyndir“ þótt hann hefði réttilega bent á að jörðin hefði ekki hitnað á undanförnum 17 árum. Þá segir í leiðaranum:

„Engu að síður sendi stjórnmálaráð BBC frá sér viðvörun um að Lawson lávarður væri í minnihluta og þess vegna “bæri ekki„ að líta þannig að orð hans vægju “jafnþungt og orð sérfræðinga á borð við Sir Brians Hoskins„.

Lawson lávarður er auðvitað ekki vísindamaður. Fjölmargir taka hins vegar til máls í BBC án þess að búa yfir formlegri þekkingu á viðkomandi sviði: Al Gore til dæmis. Nú eða Rajendra Pachauri, járnbrautaverkfræðingur að mennt, sem leiðir nú Intergovernmental Panel for Climate Change (IPCC). Innan BBC virðast menn ekki hafa áhyggjur af skorti á vísindalegri þekkingu þegar rætt er um vísindaleg viðfangsefni í tengslum við mál eins og niðurbrot (fracking) eða erfðabreyttar plöntur, um þau efni ræða grænir aðgerðarsinnar sem gestir BBC hvað sem líður furðulegum hræðslukenningum þeirra.

Lawson lávarður er hins vegar formaður Global Warming Policy Foundation (GWPF), hugveitu sem hafnar ekki hugmyndinni um hlýnun jarðar. Markmið hennar er að höfða til skynseminnar og leggja efnisleg rök til grundvallar frekar en móðursýki. Lawson lávarður nýtur ráðgjafar vísindamanna og þar til fyrir skömmu var Lennart Bengtsson, vísindamaður við Reading-háskóla í hópnum. Starfsbræður Bengtssons prófessors úr hópi vísindamanna neyddu hann nýlega til að segja sig úr stjórn GWPF.“

Hér verður ekki frekar vitnað í þennan leiðara í The Spectator. Hann sýnir að í Bretlandi taka stjórnendur ríkisútvarpsins sér í hendur dagskrárvald og gera upp á milli skoðana fólks með aðferðum ritrýnisins sem telur sumt nægilega vel ígrundað en annað ekki og vara eigi hlustendur við því ef óverðugir segi skoðun sína á umdeildum málum.

Þessa sjónarmiðs gætir í vaxandi mæli hér á landi, ekki síst innan ríkisútvarpsins. Þar hafa menn til dæmis býsnast yfir því undanfarið að „óverðugir“ sitji í valnefnd vegna skipunar í embætti seðlabankastjóra eða ætli að rannsaka erlenda áhrifaþætti bankahrunsins. Hvenær skyldi tekinn upp sá háttur að láta þess getið um viðmælendur útvarpsmanna hvort þeir hafi fullnægjandi próf til að fjalla um umræðuefnið?

Bj. Bj.