Íslands­deild Attac mótmælir frí­verslunarviðræðum milli ESB og Bandaríkjanna

Hér er á síðunni sagt frá mótmælum í mörgum Evrópuríkjum gegn viðræðum um fríverslunarsamning ESB og Bandaríkjanna. Meðal þeirra samtaka sem tóku þátt í mótmælunum eru Attac-samtökin. Í þeim er Íslandsdeild og sendi hún frá sér eftirfarandi tilkynningu laugardaginn 11. október:

„Í dag mun almenningur um alla Evrópu koma saman og mótmæla á margvíslegan hátt tveimur milliríkjasamningum sem nú eru í undirbúningi. Annarsvegar er um að ræða svokallaðan TISA samning, (Trade in Services Agreement), sem kveður á um “frjáls„ þjónustuviðskipti, og hins vegar fríverslunarsamning á milli Bandaríkjanna og Evrópusambandsins, TTIP (Transatlantic Trade and Investment Partnership). Báðir samningarnir kveða á um svokölluð “frjáls„ viðskipti og látið er sem þeir verði til mikilla hagsbóta fyrir íbúa þeirra landa sem samþykkja þá. Hið rétta er að þeir þjóna einvörðungu hagsmunum stórfyrirtækja, skerða réttindi launafólks og framselja vald til alþjóðlegra auðhringja um leið og þeir grafa undan lýðræðislegum möguleikum fólks til þess að hafa áhrif á eigin samfélög.“

Eins og fréttin af mótmælunum hér á síðunni sýnir voru mótmælin einnig gegn fríverslunarsamningi ESB og Kanada sem hefur verið kynntur og er nú til meðferðar í þingum aðila samningsins.

Íslandsdeild Attac var stofnuð 30. maí 2009 og segir á vefsíðu hennar að hún sé hluti alþjóðlegar hreyfingar fyrir lýðræðislegu eftirliti með fjármálamörkuðunum og stofnunum þeirra. Þá segir:

„Attac varð til í Frakklandi í júní 1998. Deildir eru í 48 löndum, og nú bætist Ísland við. Af bbþessum 49 eru 25 Evrópulönd, 12 í Suður-Ameríku og 6 í Afríku. Félagar eru alls yfir 85.000 í heiminum. Samnefnari samtakanna og sameiginleg krafa er að öll velta á fjármagnsmörkuðum sé skattlögð og skatturinn eyrnamerktur til samfélagsverkefna.“

ATTAC er skammstöfun á franska heiti samtakanna Action pour une taxe Tobin d’aide aux citoyens sem íslenska má á þennan hátt: Aðgerð í þágu Tobin-skatts í þágu borgaranna. Í þeim tilgangi er ætlunin „að sporna við alþjóðlegri spákaupmennsku, skattleggja fjármagnstekjurnar, refsa skattaskjólunum, hindra almenna útbreiðslu lífeyrissjóðanna… og almennt að endurheimta þau svið sem lýðræðið glataði til fjármálaheimsins og berjast gegn öllu nýju afsali á fullveldi ríkisins í nafni svokallaðra “réttinda„ fjárfesta og kaupmanna. Markmiðið er einfaldlega að endurheimta saman framtíð veraldar okkar,“ segir í stefnuyfirlýsingu samtakanna.

Bj. Bj.