Kosningahiti vex í Bretlandi - varðstaða um NHS helsta kappsmál kjósenda

Ný könnun í Bretlandi á vegum blaðsins The Guardian sýnir að kjósendur telja mikilvægast að standa vörð um NHS, breska heilbrigðis- og sjúkratryggingarkerfið, á komandi kjörtímabili en þingkosningar verða í maí. Í öðru sæti eru innflytjendamál, í þriðja sæti atvinnu-, launa- og verðlagsmál, í fjórða sæti menntamál, í hinu fimmta Evrópa og ríkisfjármál, í sjötta sæti lífeyrismál og í sjöunda glæpir.

Könnunin sýnir Verkamannaflokkinn með mest fylgi (35%), Íhaldsflokkinn í öðru sæti (31%) og UKIP, breska sjálfstæðissinna í hinu þriðja (14%). Fylgi íhaldsmanna hefur minnkað um tvö stig milli kannanna og hefur UKIP tekið fylgi frá þeim. Frjálslyndi lýðræðisflokkurinn fær 11%. Græningjar eru með 4%, Skoski þjóðarflokkurinn með 3% og Plaid Cymru í Wales með 1%.

Almenningur treystir Verkamannaflokknum best til að standa vörð um NHS. Á síðasta þingi Íhaldsflokksins lagði David Cameron forsætisráðherra gífurlega áherslu á NHS og taldi fráleitt að nokkrum dytti í hug að hann vildi hrófla þar við nokkru eftir reynslu sína sem föður langveiks barns.

Í kosningabaráttunni vegna þjóðaratkvæðagreiðslunnar um sjálfstæði Skotlands einkenndi það mjög málflutning sjálfstæðissinna að þeir mundu standa vörð um NHS og koma í veg fyrir öll áform sambandssinna undir forystu íhaldsmanna um að einkavæða starfsemi sem nú félli undir NHS.

Á lokafundi sambandssinna í Skotlandi fyrir kjördag vitnaði hjúkrunarfræðingur um ágæti NHS og lýsti eigin reynslu sem sjúklingur og starfsmaður. Sér kæmi ekki til hugar að nokkrum í Bretlandi dytti í hug að vega að NHS og þess vega kysi hún óhrædd gegn sjálfstæði Skotlands.

Í sjónvarpsumræðum fyrir þingkosningarnar verður fjórum fulltrúum, það er frá fjórum stærstu flokkunum, boðin þátttaka sem fastagestum. Taka stöðvarnar mið af stöðu flokkanna í könnunum og nú kemur UKIP inn í hóp fastagestanna á kostnað græningja eða Skoska þjóðarflokksins. Er þetta að verða að hitamáli meðal stjórnmálamanna.

Bj. Bj.