ESB-dómstóllinn setur „bóta-ferðamönnum“ skýrar skorður

Heimilt er að útiloka þá EES/ESB-borgara frá félagslegum bótum sem fara til annars aðildarríkis í „þeim eina tilgangi að njóta félagslegrar aðstoðar“ segir í dómi ESB-dómstólsins frá þriðjudeginum 11. nóvember.

Talið er að niðurstaðan verði til þess að róa þá sem hæst gagnrýna „bóta-ferðamennsku“ sem hefur látið á sér bera eftir því sem fleiri þjóðir öðlast réttarstöðu EES/ESB-borgara. Deilur vegna komu þessa fólks hafa orðið háværar í Bretlandi og að nokkru marki í Þýskalandi.

Rúmensk kona og sonur hennar lögðu málið fyrir ESB-dómstólinn eftir að dómur um félagsleg málefni í Leipzig í Þýsklandi hafnaði kröfum þeirra um ákveðnar bótagreiðslur.

ESB-dómstóllinn

ESB dómstóllinn komst að þeirri niðurstöðu að konan hefði ekki farið til Þýskalands í þeim tilgangi að vinna þar, hún sótti ekki um vinnu heldur um að fá að njóta félagslegra réttinda sem gilda einungis um þá sem eru í atvinnuleit.

Rúmenska konar nýtur barnabóta sem nema 184 evrum (28.500 ISK) á mánuði og auk þess 133 evra (20.600) styrks til lífsviðurværis á mánuði. Var ekki tekist á um rétt hennar til þessara bóta fyrir ESB-dómstólnum.

Í dómsorðinu kemur fram að reglur EES/ESB um frjálsa för fólks innan svæðisins skyldi gistiríki ekki til þess að veita neinar félagslegar bætur fyrstu þrjá mánuði sem aðfluttur dvelst í landinu. Þeir sem dveljast lengur en þrjá mánuði en innan við fimm ár og hafa ekki atvinnu „verða sjálfir að ráða yfir nægu eigin fé,“ segir dómstóllinn og einnig:

„Aðildarríki verður þess vegna að eiga þess kost að neita að veita félagslega aðstoð til ESB-borgara sem afla ekki neinna tekna en nýta sér réttinn til frjálsrar farar í þeim eina tilgangi að njóta félagalegrar aðstoðar í öðru aðildarríki þótt þeir eigi ekki nægilegt fé til að krefjast búseturéttar.“

Bj. Bj.