Ríkis­stjórnin er að falla vegna ESB og Icesave

Ríkisstjórnin er að falla vegna ESB og Icesave. Þetta blasir við. Það má vel vera, að ríkisstjórn Jóhönnu Sigurðardóttur og Steingríms J. sitji einhverjar vikur enn en það er framlenging á dauðastríði.

Hvers vegna er fyrstu hreinu vinstri stjórn, sem mynduð hefur verið á Íslandi að mistakast? Hún tók við einhverju erfiðasta búi, sem nokkur ríkisstjórn hefur tekið við en hún hafði það með sér, að almenningur treysti forsætisráðherranum í upphafi til góðra verka og pólitískir andstæðingar lágu í valnum eftir hrunið og þá fyrst og fremst Sjálfstæðisflokkurinn.

Meginástæðan fyrir því að vinstri stjórnin er að falla er Evrópusambandið. Enn einu sinni kemur það í ljós, að það kann ekki góðri lukku að stýra í samfélagi, sem byggir á lýðræði að ætla að stytta sér leið og þvinga fram niðurstöðu á bak við lokaðar dyr.

Hefði þjóðin fengið tækifæri til sumarið 2009 að greiða atkvæða um það, hvort sækja ætti um aðild að Evrópusambandinu og meirihlutinn komizt að þeirri niðurstöðu að það bæri að gera, væri staða stjórnarinnar allt önnur í dag. Þá hefðu ekki hafizt þau hjaðningavíg innan Vinstri grænna, sem nú hafa leitt til úrsagnar tveggja þingmanna þeirra.

Samfylkingin mátti ekki til þess hugsa að þessi grundvallarákvörðun um framtíð íslenzku þjóðarinnar yrði tekin af henni sjálfri. Þess í stað beitti hún pólitískum þvingunum til þess að pína fram umsókn á Alþingi. Nú situr hún uppi með afleiðingarnar. Stór hópur Vinstri grænna, alþingismenn, trúnaðarmenn og almennir stuðningsmenn láta ekki bjóða sér svona vinnubrögð.

Þess vegna er ríkisstjórnin að falla og Jóhanna Sigurðardóttir trausti rúin. Innan við 17% landsmanna treysta í dag konunni, sem naut svo víðtæks trausts fyrir tveimur árum.

Evrópusambandið er grundvallarástæðan fyrir þessari stöðu. Svo bættist Icesave við. Saga þess máls er annars vegar skýrt dæmi um ótrúlegt dómngreindarleysi þeirra fjölmörgu, sem þar hafa komið við sögu, sérfræðinga, embættismanna og stjórnmálamanna í flestum flokkum. Það er ekki minni ástæða til að setja á stofn rannsóknarnefnd um Icesave-málið og gang þess en hrunið sjálft.

Það bezta, sem Jóhanna Sigurðardóttir og Steingrímur J. Sigfússon geta gert fyrir það fólk, sem sýnt hefur þeim mikinn trúnað – þ.e. íslenzku þjóðinni – er að standa upp, viðurkenna að þau hafi steytt á skeri og efna til kosninga nú á næstu vikum.

Geri þau það ekki verða afleiðingarnar enn hörmulegri en þær þó eru orðnar.