Schauble segir fjármálamörkuðum stríð á hendur

Samtal, sem þýzka blaðið Bild am Sonntag birti í gær við Wolfgang Schauble, hinn harðsnúna fjármálaráðherra Þýzkalands, skýrir betur þá áherzlu, sem Þjóðverjar og Frakkar hafa lagt á að taka upp sérstakan skatt á fjárhagslegar tilfærslur, sem Bretar eru mjög andvígir.

Í samtalinu kemur fram, að Schauble telur vel hugsanlegt að slíkur skattur - auk þess að afla 57 milljarða evra í tekjur - muni „hægja á“ fjármálamörkuðum og jafnvel gera eitthvað af þeirri spákaupmennsku, sem stunduð er á þessum mörkuðum óarðbæra.

Það hefur ekki farið á milli mála, að mörgum aðildarríkjum Evrópusambandsins hefur verið mjög í nöp við fjármálamarkaði og starfshætti þeirra -sem út af fyrir sig er mjög skiljanlegt -og nú er að koma í ljós, að ríkisstjórnir þessara landa ætla að snúa vörn í sókn og setja fjármálamarkaðina á sinn stað.

Bretar eru algerlega andvígir þessari skattheimtu og óttast að hún muni draga mjög úr umsvifum fjármálafyrirtækja í Bretlandi, sem gegna þýðingarmeira hlutverki í brezku efnahagslífi en þeir gera á meginlandinu.

Schauble segir hins vegar í ofangreindu samtali, að náist ekki samkomulag innan ESB um skatt á fjárhagslegar tilfærslur verði hann tekinn upp á evrusvæðinu og ráðherrann vill að það verði gert strax. Hann virkar þá á þann veg, að ef annar aðili slíkra tilfærslna er staðsettur á evrusvæðinu leggst skatturinn á.

Að einhverju leyti má segja, að Wolfgang Schauble hafi með þeirri þungu áherzlu, sem hann leggur á skattinn sagt fjármálamörkuðum stríð á hendur á árinu 2012.

Eiga þeir eitthvert andsvar?