Það þrengir stöðugt að ESB og evruríkjunum

Það er að harðna á dalnum hjá lánardrottnum Grikkja, Evrópusambandinu, Alþjóða gjaldeyrissjóðnum og Seðlabanka Evrópu. Bandaríska dagblaðið Wall Street Journal fullyrðir í dag, að að sérfræðingar þríeykisins, sem hafa unnið að gerð skýrslu um stöðu mála í Aþenu muni nú í október sýna fram á að mikið bil þurfi að brúa til þess að Grikklandi verði ekki gjaldþrota í nóvember og hrökklist út af evrusvæðinu.

Slíkar fréttir hafa borizt áður. Munurinn nú er sá, að svigrúm þeirra þjóða, sem hafa borið þungann af aðstoðinni við Grikki er að minnka. Þannig getur þýzka ríkisstjórnin ekki lagt fram meira fé í þessu skyni nema með samþykki þýzka þingsins. Blaðið segir að Angela Merkel sé ákveðin í því að leggja ekki fram slíka tillögu, þar sem hún telji að hún gæti leitt til uppreisnar innan þingflokka stjórnarflokka og stjórnarkreppu í framhaldi af því.

Alls konar vangaveltur eru uppi um að Seðlabanki Evrópu geti hlaupið undir bagga með framlengingu á gömlum lánum Grikkja eða með því að veita þeim ný lán til að borga eldri lán. Bankinn á hins vegar ekki hægt um vik vegna þess að embættismenn innan hans telja að það væri brot á lögum og reglum, sem um starfsemi bankans gilda.

Þá er það spurningin, hvort Alþjóða gjaldeyrissjóðurinn geti komið til sögunnar. Þar er staðan sú, að fulltrúar þjóða utan Evrópu telja, að sjóðurinn hafi gengið of langt í lánveitingum til Grikklands og þess vegna tæplega stuðningur við það innan stjórnar AGS að ganga lengra.

Vafalaust munu hinir útsjónarsömu forsvarsmenn Evrópusambandsins finna einhverja leið út úr þessum vanda en sú leið verður ekki frekar en fyrri daginn leið, sem leiðir til varanlegrar lausnar heldur einhvers konar „redding“ til bráðabirgða.

Handan við hornið er svo Spánn, sem er ekki enn búinn að gera upp við sig hvort hann eigi að sækja formlega um neyðarlán með þeim þröngu skilmálum, sem slík ósk mund kalla yfir Spán.

Það þrengir stöðugt að Evrópusambandinu og evruríkjunum.