Dráttur á að draga aðildarumsóknina til baka er óviðunandi

Ríkisstjórn Sigmundar Davíðs Gunnlaugssonar tók formlega við völdum hinn 23.maí á síðasta ári. Þá lýsti hún því yfir að hún mundi láta gera skýrslu um stöðu viðræðna við Evrópusambandið og um þróun þess. Þá skýrslu átti að leggja fyrir Alþingi sl. haust. Nú er kominn 14. febrúar 2014 og þessi skýrsla hefur enn ekki séð dagsins ljós. Síðast var sagt að það yrði „fljótlega“. Ríkisstjórnin hefur gert „hlé“ á viðræðum við Evrópusambandið en Ísland er enn „umsóknarríki“, þrátt fyrir að hér hafi setið bráðum í 9 mánuði við völd flokkar, sem lýstu því yfir fyrir kosningar að þeir mundu binda endi á þetta mál.

Nú ber að sýna því skilning að ný ríkisstjórn þarf að fá tíma til að koma stefnumálum sínum í farveg en það segir ekki góða sögu um skilvirkni íslenzkrar stjórnsýslu hvað afgreiðsla þessa máls hefur tekið langan tíma. Það er ekki hægt að skýra það á nokkurn hátt með frambærilegum rökum. Þetta eru einfaldlega léleg vinnubrögð. Þau lofa því miður ekki góðu. Hvað ætli taki svo langan tíma fyrir ríkisstjórn og Alþingi að að komast að niðurstöðu um endanlega afgreiðslu málsins?

Það er vont fyrir samfélagið að hafa þetta mál hangandi í lausu lofti. Það þvælist fyrir öðrum málum, sem mikilvægt er að takast á við í samskiptum við Evrópuríkin. Fyrir nokkrum dögum hafði meðlimur í framkvæmdastjórn Evrópusambandsins orð um að nálægt 80% af brezkri löggjöf, sem nú er afgreidd á þingi Bretlands komi frá Evrópusambandinu. Getur þetta verið? Hver er staðan hjá EES-ríkjunum? Hver er staðan hér á Íslandi? Það er tímabært að ræða þessi mál og fleiri en það verður ekki gert svo vit sé í á meðan aðildarumsóknin liggur í skúffu í Brussel.

Þar að auki er ljóst að það þarf að ganga frá þessu máli til þess að við getum snúið okkur að því að móta uppbyggilega utanríkisstefnu fyrir framtíðina. Það var ekki tekizt á við það verkefni í ljósi þeirra breyttu aðstæðna, sem sköpuðust, þegar bandaríska varnarliðið hvarf af landi brott. Sjálfsagt vegna þess að Samfylkingin tók við utanríkisráðuneytinu vorið 2007 og hafði ekki annað í huga en að koma Íslandi inn í Evrópusambandið.

Nú er kominn tími á að vinna hefjist við mótun utanríkisstefnu 21.aldarinnar á þeim grundvelli að Ísland standi utan Evrópusambandsins en forsenda fyrir því er sú aðaðildarumsóknin verði dregin til baka.

Það er ekki hægt að una lengur við þann drátt, sem á þessu máli hefur orðið.