Mánudagurinn 9. desember 2013

Lög­regla lætur til skarar skríða gegn mótmælendum í Kiev - stjórnar­andstaðan segir brotist inn í skrifstofur sínar

Lög­regla hefur tekið til við að leysa upp búðir mótmælenda við opinberar byggingar í Kiev, höfuðborg Úkraínu. Stjórnar­andstæðingar segja að lög­regla hafi einnig ráðist á flokksskrifstofu sína.

Þýzkaland: Ungir jafnaðarmenn andvígir stjórnar­samstarfi með Kristilegum

Ungir jafnaðarmenn í Þýzkalandi eru andvígir þátttöku SPD í ríkis­stjórn með Angelu Merkel. Samtök þeirra tóku ákvörðun sl. laugardag um að greiða atkvæði gegn stjórnar­samstarfinu.

Finnland: Óeirðir á þjóðhátíðardegi

Til átaka kom á þjóðhátíðardegi Finna í Tampere í vesturhluta landsins. Um 200 mótmælendur birtust þar sem formleg hátíðahöld fóru fram. Þeir veltu um öryggisgirðingum og kveiktu á flugeldum. Tæplega 30 einstaklingar voru handteknir. Eitthvað var um að rúður væru brotnar í húsum. Flöskum var kastað í lög­reglumenn. Lög­reglan notaði táragas.

Ítalía: Matteo Renzi kjörinn formaður Lýðræðis­flokksins

Matteo Renzi, borgar­stjóri í Flórens var í gær kjörinn formaður hins vinstri sinnaða Lýðræðis­flokks á Ítalíu, sem á rætur í hinum gamla kommúnista­flokki landsins. Flokkurinn á aðild að núverandi ríkis­stjórn. Renzi er 38 ára gamall og fékk um 68% atkvæða. Ítalíuútgáfa evrópska vefmiðilsins TheLocal segir að um 2,5 milljónir kjósenda hafi tekið þátt í atkvæða­greiðslunni.

Kænugarður: Þúsundir mótmælenda í miðborginni í nótt

Þúsundir mótmælenda höfðust við í miðborg Kænugarðs í nótt eftir mótmæli gærdagsins, þótt kalt sé í veðri. BBC segir mótmælendur hafa gefið Yanukovych, forseta landsins 48 klukkustundir til að setja ríkis­stjórn landsins af. Fréttamaður BBC á staðnum segir að það hafi aukið á spennu í borginni, þegar styttan af Lenín var felld af stalli.

ESB ákveður að loka sendiskrifstofu á Vanuatu-eyjaklasanum í S-Kyrrahafi - kenndi krikket og setti upp leikrit

Breska blaðið The Daily Telegraph birtir greina­flokk um útgjöld Evrópu­sambandsins um þessar mundir og dregur mánudaginn 9. desember athygli að utanríkis­þjónustu sambandsins, European External Action Service (EEAS) sem blaðið segir „ótrúlega stóra og að mestu leyti án þess að unnt sé að réttlæta“ sta...